【有片】傅嘉莉激動反撃「肥叔叔」傳聞

817

傅嘉莉(Kelly)自2013年加入TVB以來就是非不斷,除早前在IG以千字文形式重提被屈「是呂慧儀與前夫之間的第三者」一事外,早在2014年更曾被拍得與一名星洲富商,被傳傳媒稱作「四眼肥叔叔」的有婦之夫在中環掃貨,多年來的花邊新聞或多或少也對她的事業構成影響。今日(28日),又再有娛樂雜誌以她是「孤獨精」、「全身名牌與收入不符合」、「出入坐名車有專車接送」為題,寫了一篇新聞報導,被屈多年,傳嘉莉終於忍夠,決定為自己平反!今日Kelly到尖沙嘴出席活動時,對於被指自封女一,她說:「成個報道睇完我覺得好委屈,因為自己真係好努力去工作、去拍劇,但係別人嘅焦點放咗喺一啲錯誤嘅畫面上,例如我嘅衫褲鞋襪袋,係公司嘅設計師搵番嚟畀我着、畀我戴嘅,全部都唔係私伙,全部係TVB嘅服飾,我亦冇擺過女一嘅架子。我入咗行咁耐,我而家將好多負面嘅嘢轉化成正面,我會諗多咗個女一稱號都好,但講真『女一』係公司畀嘅,而唔係我自己可以扮出嚟,我希望啲人注意我工作方面,而唔係其他。」

然後Kelly提到之前在IG上斥呂慧儀和黃文廸當年博宣傳,她說:「咁我明白,可能我最近喺IG為自己澄清,畀人覺得『你搞是非』,其實我只係想幫自己澄清,覺得冤屈,當時覺得自己唔識講嘢,又成日講錯嘢,所以我之前冇澄清,但我真係好唔想每次有呢啲事,就關我事,畀我一個咁差嘅名號,所以我想為自己澄清,而唔係搞是非,亦冇被其他演員藐視,我哋一齊拍戲好開心好融洽,有互相勉勵,可能觀眾睇唔到就覺得『你係咪孤獨精』、『畀人哋杯葛』,點解要咁睇呢件事,我睇完覺得好委屈。」

對於早前有報道指她有私人司機接載,Kelly勞氣地說:「其實嗰個係我親細佬,佢得閒就車我同屋企人去買嘢、行街,而唔係專人司機,我亦冇當佢係司機,我同我哥哥、細佬同屋企人好好關係,係一個好開心嘅family,我睇完都好唔開心。我細佬俾人影過好多次,但冇人知佢係我細佬,只覺得佢係司機,我呢架車係最低級型號,我供緊,細細架(車)方便我返工,但方便唔到我屋企人,買架7人車又覺得我乜嘢星級專用車,我做每樣嘢都有人用有色眼鏡、或者一個錯嘅角度望我,一路以嚟我以為唔講就會冇嘢,原來唔係,就算我而家乜都冇做,都寫咁多呢啲嘢,而家會open去講。」

她指近年負面新聞不絕,覺得不開心,又稱自己花很多時間拍劇,但被人抹煞她的努力,只是想她過去的事,她感嘆地說:「佢哋永遠諗番啲4、5年前錯誤嘅新聞,我有好多唔同年紀、唔同身形、未婚或已婚唔同種類嘅朋友,我有我嘅私人生活,都會出街同聚會,唔通我做藝人,我就唔可以同其他人去相處咩?點解啲人就會好focus『你同一個年紀大嘅人就肯定係咩喇』,我每次睇到都覺得好委屈,而我冇辦法去解釋到,因為啲人就係鍾意睇呢樣嘢,以前我唔識講係因為驚越描越黑,大家會唔會諗多咗,佢只係一個我好尊敬嘅長輩,佢教識我好多嘢,真係有嘢,就唔會咁易俾你哋影到,我只係一個small potato,唔想同朋友出去食飯,叫佢哋唔好望住我、坐過啲。」

之後Kelly還主動提到多年前被指與「肥叔叔」在的士又攬又啜事件:「可能真係巧合又或者被安排,一截完的士上車就俾人影埋,我講緊肥叔叔事件,佢嘅身形,令到我喺張相度畀人有錯覺,正常社交可能會有個friend hug,但啲人一睇『哇!肯定係咩啦』,件事本身係去食飯,佢要買禮物畀佢老婆。」

至於被指利用朋友為自己的飾物品牌宣傳,Kelly非常勞氣地說:「喺報道就話我利用佢、用盡佢,我真係覺得好難聽好難受,我唔可以有朋友嘅?我真係好用心去做,每個頭箍用幾日時間去設計,所有嘢都係我自己做,但我覺得真心支持我嘅朋友會繼續支持,唔會受呢啲扭曲嘅報道影響,我亦唔會care。」即刻去片:01新聞嘅採訪片段